Қазақстан мен Өзбекстан көлік инфрақұрылымын дамыту және екі ел арасындағы жүк тасымалы көлемін арттыру бағытындағы бірлескен жұмысты жалғастыруда.
Екі елдің көлік ведомстволары өкілдерінің жұмыс кездесуінде теміржол көлігі мен логистика саласында бұрын қол жеткізілген уағдаластықтардың орындалуы қаралды. Қазақстан-Өзбекстан шекарасындағы инфрақұрылымның өткізу қабілетін арттыруға, халықаралық көлік дәліздерін дамытуға және терминалдық қуаттарды кеңейтуге ерекше назар аударылды.
Басым бағыттардың бірі — Қытай – Қазақстан – Өзбекстан бағыты бойынша жүк тасымалын ұлғайту. Бұл дәліздің дамуы Қытай, Орталық Азия және басқа халықаралық нарықтар арасындағы транзит үшін қосымша мүмкіндіктер ашады.
Шекаралық және терминалдық инфрақұрылымды дамыту маршруттардың өткізу қабілетін арттырып, жеткізу нұсқаларын кеңейтеді және Қазақстанның өңірдегі негізгі транзиттік орталықтардың бірі ретіндегі рөлін нығайтады.
